Analar
Hüseyn Arif

  Sayı: 101 -

Tweetle

Elə ki, balalar gəlir dünyaya,

O gündən hey ölçüb-biçir analar.

Mahnı da oxuyur, şeir də deyir,

Bəstəkar analar, şair analar.

Dözür hər əzaba o bilə -bilə.

Yaşayır, sirrini salmadan dilə.

Vaxt olur, qaldırıb ağını belə,

Şərbət əvəzinə içir analar.

Unudub illərin yorğunluğunu,

Həyatda dincliyi, evdə yuxunu:

Sevincin azını, qəmin çoxunu,

Yükün ağırını seçir analar.

Özüm də bilmirəm, Hüseyn, niyə?

Başımın tüstüsü çəkilir göyə.

Torpağım anasız qalmasın deyə

Torpağın qoynuna köçür analar.